తెలుగువేవ్ తో 66వ డివిజన్ జనసేన అభ్యర్థి మట్లా రవీంద్ర
విజయవాడ: నగర సమగ్ర అభివృద్ధితో పాటు 66వ డివిజన్‌ను మోడల్ డివిజన్‌గా తీర్చిదిద్దడమే తన ప్రధాన లక్ష్యమని జనసేన పార్టీ 66వ డివిజన్ అభ్యర్థి మట్లా రవీంద్ర స్పష్టం చేశారు. స్థానికంగా ఎదురవుతున్న తీవ్రమైన మౌలిక వసతుల కొరత, పారిశుధ్య లోపాలు, సుదీర్ఘకాలంగా పెండింగ్‌లో ఉన్న పేదల సమస్యలపై ఆయన గళమెత్తారు. డివిజన్ ప్రజల సంక్షేమం, అభివృద్ధి ఎజెండాతో ముందుకు సాగుతున్న ఆయన తెలుగు వేవ్ ప్రతినిధితో ప్రత్యేకంగా మాట్లాడారు. ఆ ముఖాముఖి వివరాలు మీకోసం..
66వ డివిజన్లో ప్రస్తుతం ప్రజలు ఎదుర్కొంటున్న ప్రధాన సమస్యలేమిటి? మీ ప్రాధాన్యతలు ఏంటి?
ఈ డివిజన్లో గత కొంతకాలంగా మౌలిక వసతుల కల్పన తీవ్రంగా నిర్లక్ష్యానికి గురైంది. నివాస ప్రాంతాల్లో సరైన సౌకర్యాలు లేక ప్రజలు తీవ్ర ఇబ్బందులు పడుతున్నారు. డివిజన్ పరిధిలోని ప్రతి ఇంట్లోనూ ప్రాథమిక వసతులు అందుబాటులోకి తీసుకురావడం, ప్రజల జీవన ప్రమాణాలను పెంచడమే నా మొదటి ప్రాధాన్యం.
డివిజన్లో మురుగునీటి పారుదల (డ్రైనేజీ), వీధి దీపాల పరిస్థితి చాలా దారుణంగా ఉందని వార్తలు వస్తున్నాయి. వీటిపై మీ యాక్షన్ ప్లాన్ ఏమిటి?
అవును డ్రైనేజీ కట్లు (అడ్డంకులు) సరిగా లేకపోవడం వల్ల మురుగునీరు రోడ్లపైకి వచ్చి తీవ్ర దుర్గంధం, రోగాల బారిన పడే పరిస్థితి నెలకొంది. నేను గెలిచిన వెంటనే డ్రైనేజీ అడ్డంకులను శాశ్వతంగా తొలగించి, నీటి పారుదల వ్యవస్థను పునర్నిర్మిస్తాను. అంతేకాకుండా, రాత్రివేళల్లో ప్రజల భద్రతను దృష్టిలో ఉంచుకుని డివిజన్‌లోని ప్రతి వీధిలోనూ నాణ్యమైన వీధి దీపాలు వెలిగేలా తక్షణ చర్యలు తీసుకుంటాం.
ఇక్కడ నివసించే నిరుపేదల ఇళ్ల పట్టాల అంశం చాలా కాలంగా నలుగుతోంది. దీనిపై మీరు ఎలాంటి కృషి చేయబోతున్నారు?
పేదల ఇళ్ల పట్టాల క్రమబద్ధీకరణ అనేది చాలా సున్నితమైన, ముఖ్యమైన అంశం. ఏళ్ల తరబడి నివాసముంటున్న పేదలకు సొంతింటి హక్కు లభించడం వారి హక్కు. ఈ అంశంపై అధికారులతో, ప్రభుత్వం వద్ద గట్టిగా పోరాడి, అర్హులైన ప్రతి పేద కుటుంబానికి ఇళ్ల పట్టాలు క్రమబద్ధీకరించేలా నా శాయశక్తులా కృషి చేస్తానని హామీ ఇస్తున్నాను.
చివరిగా 66వ డివిజన్ ఓటర్లకు, ప్రజలకు మీరు ఏం చెప్పాలనుకుంటున్నారు?
ప్రతికూల పరిస్థితుల్లో కూడా డివిజన్ ప్రజలకు అండగా ఉండటానికే నేను రాజకీయంలోకి వచ్చాను. సమస్యల పరిష్కారం కోసం నిరంతరం అందుబాటులో ఉండే ప్రజాప్రతినిధిగా ఉంటాను. నాకు ఒక్క అవకాశం ఇచ్చి ఆశీర్వదిస్తే, 66వ డివిజన్‌ను విజయవాడలోనే ఒక మోడల్ డివిజన్‌గా అభివృద్ధి చేసి చూపిస్తాను. జనసేన మార్క్ పాలనను డివిజన్ ప్రజలకు అందిస్తాను.
