-కమ్యూనికేషన్ స్కిల్స్ ఉంటే అవకాశాలు మనవైపే..!
మనిషి ప్రతిభ ఎంత గొప్పదైనా.. దాన్ని ఎదుటివారికి సరిగ్గా వివరించలేకపోతే ఆ ప్రతిభకు గుర్తింపు తగ్గిపోతుంది. చదువు, తెలివి, నైపుణ్యం ఎంత ముఖ్యమో.. మన ఆలోచనలను స్పష్టంగా, సమర్థంగా వ్యక్తీకరించే కమ్యూనికేషన్ స్కిల్స్ కూడా అంతే కీలకం. నిజానికి మన గురించి ఎదుటివారికి కలిగే తొలి అభిప్రాయం చాలాసార్లు మన మాట తీరు నుంచే ఏర్పడుతుంది.
ఒక ఉద్యోగ ఇంటర్వ్యూను ఉదాహరణగా తీసుకుందాం. ఇద్దరు యువకులకు సమానమైన విద్యార్హతలు, ప్రతిభ ఉన్నాయనుకుందాం. ఒకరు భయంతో, తడబడుతూ తన గురించి చెప్పుకోలేకపోతే.. మరొకరు ప్రశాంతంగా, స్పష్టంగా తన ఆలోచనలను చెప్పగలిగితే అవకాశం ఎవరిని వరిస్తుందో అర్థం చేసుకోవచ్చు. ఇక్కడ తేడా తెలివిలో కాదు.. ఆ తెలివిని వ్యక్తీకరించే విధానంలో ఉంటుంది.
కమ్యూనికేషన్ అంటే కేవలం ఇంగ్లిష్లో మాట్లాడటం కాదు. ఎదుటివారు చెప్పేది శ్రద్ధగా వినడం, విషయం అర్థం చేసుకుని స్పందించడం, సరైన సమయంలో సరైన మాట చెప్పడం, ఎదుటివారి భావాలను గౌరవించడం కూడా కమ్యూనికేషన్లో భాగమే. మాటల్లో మర్యాద, ఆలోచనల్లో స్పష్టత, ప్రవర్తనలో ఆత్మవిశ్వాసం ఉంటే వ్యక్తిత్వానికి మరింత విలువ పెరుగుతుంది.
‘నాకు తెలియదు’ అని అక్కడితో ఆగిపోవడం కంటే.. ‘తెలుసుకునే ప్రయత్నం చేస్తాను’ అని చెప్పడం మంచి ఆలోచనా విధానాన్ని చూపిస్తుంది. ‘నేను చేయలేను’ అనే మాటకు బదులు.. ‘ఒక్కసారి ప్రయత్నిస్తాను’ అని చెప్పడం మనలోని ఆత్మవిశ్వాసాన్ని పెంచుతుంది. చిన్న మాట మార్పే కొన్నిసార్లు పెద్ద అవకాశానికి తలుపు తెరుస్తుంది.
అయితే మాటల్లో ఆత్మవిశ్వాసం ఉండాలి కానీ అహంకారం ఉండకూడదు. మన అభిప్రాయాన్ని చెప్పడంతో పాటు.. ఎదుటివారి అభిప్రాయాన్ని గౌరవించడం నేర్చుకోవాలి. కోపంలో మాట్లాడిన ఒక్క మాట సంబంధాన్ని దెబ్బతీయవచ్చు. ఆప్యాయంగా పలికిన ఒక్క మాట కొత్త బంధానికి పునాది వేయవచ్చు.
అందుకే యువత తమ చదువుతో పాటు మాట్లాడే విధానాన్ని కూడా మెరుగుపరుచుకోవాలి. ప్రతిరోజూ కొత్త విషయాలు చదవడం, మాట్లాడే ముందు ఆలోచించడం, ఇతరులు చెప్పేది శ్రద్ధగా వినడం, అద్దం ముందు మాట్లాడటం వంటి చిన్న అలవాట్లు కమ్యూనికేషన్ నైపుణ్యాలను పెంచుతాయి. మాటలు చిన్నవే కావచ్చు.. కానీ వాటి ప్రభావం మాత్రం జీవితాన్ని మార్చగలదు. నీ మాట తీరు మార్చుకో.. నిన్ను చూసే ప్రపంచం తీరు కూడా మారుతుంది.
