-పిల్లల బలవన్మరణాల వెనుక కారణాలను గుర్తిస్తే.. ఎన్నో జీవితాలను కాపాడొచ్చు
ఒక పరీక్షలో తక్కువ మార్కులు.. ఒక మాటతో వచ్చిన అవమానం.. స్నేహితుడితో చిన్న గొడవ.. తల్లిదండ్రుల అంచనాలు.. ఇవేవీ ఒక జీవితానికి ముగింపు కావాల్సిన కారణాలు కావు. అయినా కొందరు పిల్లలు సమస్యను ఎదుర్కొనే మార్గం కనిపించక తీవ్ర నిర్ణయాల వైపు వెళ్లడం ఆందోళన కలిగిస్తోంది. అసలు సమస్య పిల్లల్లోనే ఉందా? లేక వారి చుట్టూ ఏర్పడుతున్న ఒత్తిడి వాతావరణంలో ఉందా? ఈ ప్రశ్నపై ప్రతి కుటుంబం ఆలోచించాల్సిన అవసరం ఉంది.
మార్కులే విజయానికి కొలమానం కాదు
చదువు, ర్యాంకులు, పోటీ పరీక్షలు.. ఇవన్నీ భవిష్యత్తుకు అవసరమే. కానీ వాటినే జీవితానికి ఏకైక ప్రమాణంగా మార్చడం పిల్లలపై మానసిక భారాన్ని పెంచుతుంది. ‘ఎంత మార్కులు వచ్చాయి?’ అనే ప్రశ్నతో పాటు ‘నువ్వు ఎలా ఉన్నావు?’ అని అడగడం కూడా అంతే ముఖ్యం.
పోలికలు.. కనిపించని ఒత్తిడి
‘పక్కింటి అబ్బాయికి ఇంత వచ్చింది.. నీకు ఎందుకు రాలేదు?’ అనే పోలిక పిల్లల్లో ఆత్మవిశ్వాసాన్ని దెబ్బతీయవచ్చు. ప్రతి పిల్లవాడి సామర్థ్యం, ఆసక్తి, నేర్చుకునే వేగం వేరు. పోల్చడం కంటే ప్రోత్సహించడం అవసరం.
మౌనం కనిపిస్తే.. మాట మొదలుపెట్టాలి
పిల్లలు అకస్మాత్తుగా అందరికీ దూరంగా ఉండటం, ఎక్కువగా మౌనంగా మారటం, చదువు లేదా రోజువారీ పనులపై ఆసక్తి కోల్పోవడం వంటి మార్పులను పెద్దలు నిర్లక్ష్యం చేయకూడదు. ప్రశ్నించడమే కాదు.. తీర్పు ఇవ్వకుండా వినడం నేర్చుకోవాలి. అవసరమైతే ఉపాధ్యాయులు, కౌన్సిలర్లు లేదా మానసిక ఆరోగ్య నిపుణుల సహాయం తీసుకోవాలి.
ఒక మాట.. ఒక జీవితం
పిల్లలకు ‘విఫలం అయితే అంతే’ అనే భావన కాకుండా ‘విఫలం నుంచి మళ్లీ మొదలుపెట్టొచ్చు’ అనే నమ్మకాన్ని ఇవ్వాలి. వారి సమస్య చిన్నదిగా కనిపించినా.. వారి మనసులో అది పెద్దదై ఉండొచ్చు. పిల్లలను గెలిపించేది ఒత్తిడి కాదు.. అర్థం చేసుకునే మనసు. వారికి కావాల్సింది తీర్పు కాదు.. తోడు. ఎందుకంటే ఒక సమస్యకు పరిష్కారం ఉండొచ్చు.. కానీ ఒక ప్రాణానికి ప్రత్యామ్నాయం ఉండదు.
