చర్మంపై వచ్చే ప్రతి గుల్ల క్యాన్సర్ కాదు..
కొన్ని లక్షణాలను మాత్రం అస్సలు విస్మరించొద్దని వైద్యుల సూచన
చర్మంపై అకస్మాత్తుగా చిన్న మాంసపు ముక్కలా వేలాడుతున్నట్లు కనిపించే గుల్లలు చాలామందిలో ఆందోళన కలిగిస్తాయి. అవి ప్రమాదకరమైనవని భయపడుతుంటారు. వైద్య నిపుణుల ప్రకారం అలాంటి గుల్లల్లో ఎక్కువ శాతం స్కిన్ ట్యాగ్స్ అనే సాధారణ చర్మ పెరుగుదలలే. ఇవి ప్రాణాపాయం కలిగించవు. చర్మంపై వచ్చే ప్రతి గుల్ల ఒకే రకం కాదని, కొన్ని సందర్భాల్లో అవి ఇతర చర్మ వ్యాధులకు లేదా అరుదుగా చర్మ క్యాన్సర్కు అవకాశం ఉందని నిపుణులు హెచ్చరిస్తున్నారు.
స్కిన్ ట్యాగ్స్ అంటే ఏమిటి?
స్కిన్ ట్యాగ్ అనేది చర్మానికి చిన్న కాడ ద్వారా వేలాడుతూ ఉండే మెత్తని మాంసపు పెరుగుదల. ఇవి సాధారణంగా నొప్పి కలిగించవు. దురద, మంట కూడా ఉండదు. బట్టలు లేదా నగలు తగిలి రుద్దుకున్నప్పుడు మాత్రమే ఇబ్బంది కలిగిస్తాయి.
ఎక్కడ ఎక్కువగా వస్తాయి?
శరీరంలో రాపిడి ఎక్కువగా ఉండే ప్రాంతాల్లో ఇవి ఎక్కువగా కనిపిస్తాయి. మెడ చుట్టూ, చంకల్లో, గజ్జలు, తొడల లోపలి భాగంలో, రొమ్ముల కింది భాగంలో, కనురెప్పలపై ఎక్కువగా వస్తాయి.
ఎందుకు వస్తాయి?
స్కిన్ ట్యాగ్స్ రావడానికి అనేక కారణాలు ఉన్నాయి. చర్మం పదేపదే రుద్దుకోవడం.. గర్భధారణ సమయంలో హార్మోన్ల మార్పులు.. ఊబకాయం, బరువు పెరగడం.. ఇన్సులిన్ రెసిస్టెన్స్, మధుమేహానికి సంబంధించిన మార్పులు.. కుటుంబంలో ఇలాంటి సమస్య ఉన్నవారిలో జన్యుపరమైన ప్రభావం చూపుతాయి.
సాధారణ స్కిన్ ట్యాగ్ను ఎలా గుర్తించాలి?
సాధారణంగా ఇవి మెత్తగా ఉంటాయి. చిన్న కాడపై వేలాడుతూ కనిపిస్తాయి. చర్మం రంగులోనే లేదా కొద్దిగా ముదురు రంగులో ఉంటాయి. చేతితో తాకితే సులభంగా కదులుతాయి. సాధారణ పరిస్థితుల్లో నొప్పి లేదా దురద ఉండదు.
ప్రతి గుల్లను స్కిన్ ట్యాగ్ అనుకోవద్దు
కొన్ని గుల్లలు వైరస్ వల్ల వచ్చే వార్ట్స్ కావచ్చు. మరికొన్ని వయస్సు పెరిగేకొద్దీ ఏర్పడే చర్మ మచ్చలు కావచ్చు. అందువల్ల స్వయంగా నిర్ణయించుకోవడం కంటే వైద్యుడి సలహా తీసుకోవడం మంచిది.
ప్రమాద సంకేతాలు ఇవే
చర్మంపై కొత్తగా వచ్చిన గుల్లలో ఈ లక్షణాలు కనిపిస్తే వెంటనే చర్మవ్యాధుల నిపుణుడిని సంప్రదించాలి.
- ఆకారం అసమానంగా ఉండటం
- అంచులు సరిగా లేకపోవడం
- ఒకే గుల్లలో పలురంగులు కనిపించడం
- పరిమాణం వేగంగా పెరగడం
- కాలక్రమంలో ఆకారం, రంగు మారడం
- రక్తస్రావం లేదా చీము కారడం
- గట్టిగా మారి తీవ్రమైన నొప్పి కలగడం
- ఇంట్లో తొలగించే ప్రయత్నాలు ప్రమాదకరం
స్కిన్ ట్యాగ్ను కత్తెరతో కత్తిరించడం, దారంతో బిగించడం లేదా ఇంటి చిట్కాలతో తొలగించేందుకు ప్రయత్నించడం ప్రమాదకరం. ఇలా చేస్తే రక్తస్రావం, ఇన్ఫెక్షన్, శాశ్వత మచ్చలు ఏర్పడే అవకాశం ఉంది.
వైద్యులు ఎలా తొలగిస్తారు?
అవసరమైతే చర్మవ్యాధుల నిపుణులు క్లినిక్లోనే అత్యంత సురక్షితంగా స్కిన్ ట్యాగ్స్ను తొలగిస్తారు. లిక్విడ్ నైట్రోజన్తో ఫ్రీజ్ చేయడం, ఎలక్ట్రోసర్జరీ లేదా చిన్న శస్త్రచికిత్స ద్వారా నిమిషాల్లోనే చికిత్స పూర్తి చేస్తారు.
చర్మంపై కనిపించే ప్రతి చిన్న మార్పును భయంతో చూడాల్సిన అవసరం లేదు. అదే సమయంలో నిర్లక్ష్యం చేయడం కూడా మంచిది కాదు. కొత్తగా ఏర్పడిన గుల్లల్లో అనుమానాస్పద లక్షణాలు కనిపిస్తే ఆలస్యం చేయకుండా చర్మవ్యాధుల నిపుణుడిని సంప్రదించడం ద్వారా పెద్ద సమస్యలను ముందుగానే గుర్తించి చికిత్స పొందే అవకాశం ఉంటుంది. అవగాహన, అప్రమత్తతే చర్మ ఆరోగ్యానికి అసలైన రక్షణ.
గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.
