డెన్మార్క్లో పురావస్తు శాస్త్రవేత్తలకు లభించిన ఒక చిన్న నల్లటి పదార్థం శాస్త్రవేత్తలను ఆశ్చర్యపరిచింది. అది సాధారణ చెట్టు బెరడు కాదు. సుమారు 5,700 ఏళ్ల క్రితం ఒక మనిషి నమిలిన బిర్చ్ పిచ్ ( ప్రాచీన కాలంలో (రాతి యుగంలో) మానవులు ఉపయోగించిన ఒక రకమైన జిగురు లేదా అంటు పదార్థం. బిర్చ్ చెట్టు బెరడును వేడి చేసి, గాలి తగలకుండా తారులా తయారు చేసిన ఈ పదార్థాన్ని రాతి పనిముట్లను కర్రలకు అంటించడానికి ఉపయోగించేవారు.) ముక్క. అందులో నుంచి పరిశోధకులు ఒక ప్రాచీన మహిళకు సంబంధించిన పూర్తి జన్యు సమాచారాన్ని , ఆమె నోటిలో ఉన్న సూక్ష్మజీవులు, ఆమె తిన్న ఆహారానికి సంబంధించిన ఆనవాళ్లను కూడా గుర్తించారు.
ఈ పరిశోధన ఫలితాలు నేచర్ కమ్యూనికేషన్సలో ప్రచురితమయ్యాయి. చేతిలో పట్టుకునేంత ముక్కలో ఒక వ్యక్తి జీవనానికి సంబంధించిన ఇంత సమాచారం లభ్యం కావడ్ఢమా పురావస్తు శాస్త్రంలో అరుదైన విషయంగా పరిశోధకులు భావిస్తున్నారు.
చెట్టు బెరడు నుంచి తయారైన పదార్థం
ఈ నమిలిన బిర్చ్ పిచ్ ముక్క డెన్మార్క్లోని దక్షిణ ప్రాంతంలో ఉన్న సిల్తోల్మ్ వద్ద బయటపడింది. ఇది సుమారు 5,700 ఏళ్ల నాటిదిగా గుర్తించారు.
బిర్చ్ చెట్టు బెరడును వేడి చేసి కరిగించడం ద్వారా నల్లగా, జిగటగా ఉండే పిచ్ను తయారు చేసేవారు. దీనిని నమిలి మెత్తగా చేసి, రాతి పనిముట్లను చెక్క కర్రలకు బిగించేందుకు అంటుకునే పదార్థంగా ఉపయోగించి ఉండవచ్చని పరిశోధకులు భావిస్తున్నారు. ఈ పిచ్లోని జిగట, రెసిన్ వంటి లక్షణాలు కీలకంగా మారాయి. పదార్థం లోపల చిక్కుకున్న జీవ సంబంధమైన అవశేషాలను వేల సంవత్సరాల పాటు కాపాడటానికి ఇది ఒక చిన్న ‘ఆర్కైవ్’లా పనిచేసింది.
ఎముకలు లేకుండానే పూర్తి జన్యు సమాచారం
ఈ పిచ్ ముక్క నుంచి పరిశోధకులు ఒక మహిళకు సంబంధించిన దాదాపు పూర్తి జన్యు సమాచారాన్ని పొందారు. ఆమె పశ్చిమ యూరప్కు చెందిన వేటగాళ్లు, ఆహార సేకరణదారులతో దగ్గరి సంబంధం ఉన్న సమూహానికి చెందినదని DNA విశ్లేషణ సూచించింది. ఆమె మధ్య స్కాండినేవియాకు చెందిన వేటగాళ్ల సమూహానికి కాకుండా యూరప్ ప్రధాన భూభాగం నుంచి వచ్చిన వంశానికి చెందినదిగా పరిశోధకులు గుర్తించారు. డిఎన్ఏ ఆధారంగా ఆమె రూపురేఖలపై కూడా అంచనాలు వేశారు. ఆమెకు ముదురు చర్మం, ముదురు గోధుమ రంగు జుట్టు, నీలి కళ్లు ఉండి ఉండవచ్చని పరిశోధకులు భావించారు. అంటే వేల సంవత్సరాల క్రితం జీవించిన ఒక మహిళ గురించి ఆమె ఎముకలు లేకపోయినా, కేవలం ఆమె నమిలిన పిచ్ ముక్క ద్వారా కీలక సమాచారం లభించింది.
ఆమె నోటిలోని సూక్ష్మజీవులు కూడా బయటపడ్డాయి
పిచ్లో మానవ డిఎన్ఏ మాత్రమే కాదు, ఆమె నోటిలో ఉన్న సూక్ష్మజీవులకు సంబంధించిన డిఎన్ఏ కూడా లభించింది. బ్యాక్టీరియా, వైరస్లకు సంబంధించిన జన్యు ఆనవాళ్లు ఇందులో ఉన్నాయి. దీంతో ఆమె నోటి ఆరోగ్యం, అప్పటి నోటిలో ఉన్న సూక్ష్మజీవుల గురించి కూడా పరిశోధకులకు సమాచారం లభించింది. ఇలాంటి అవశేషాలు భవిష్యత్తులో ప్రాచీన ప్రజల ఆరోగ్యం, వ్యాధులు, ఆహారం, జీవన విధానం వంటి అంశాలను అర్థం చేసుకోవడంలో ఉపయోగపడవచ్చు.
5,700 ఏళ్ల క్రితం ఆమె ఏం తిన్నదో కూడా తెలిసింది
ఈ ఆవిష్కరణలో మరో ఆసక్తికరమైన విషయం ఆమె తిన్న ఆహారానికి సంబంధించిన డిఎన్ఏ ఆనవాళ్లు లభించడం. పిచ్లో జంతువులు, మొక్కలకు సంబంధించిన జీవ అవశేషాలు గుర్తించారు. అవి ఆమె నమిలే ముందు లేదా ఆ సమయంలో తిన్న ఆహారం నుంచి వచ్చినవిగా పరిశోధకులు భావిస్తున్నారు. అంటే ఒక చిన్న పిచ్ ముక్క ద్వారా ఆ కాలానికి చెందిన ఒక వ్యక్తి ఎవరు, ఆమె వంశం ఏమిటి, ఆమె రూపురేఖలు ఎలా ఉండేవి, ఆమె నోటిలో ఎలాంటి సూక్ష్మజీవులు ఉండేవి, ఆమె ఏ ఆహారం తిని ఉండవచ్చు అనే అనేక విషయాలను తెలుసుకునే అవకాశం ఏర్పడింది.
పురావస్తు పరిశోధనకు కొత్త మార్గం
ఇప్పటివరకు ప్రాచీన డిఎన్ఏ కోసం శాస్త్రవేత్తలు ప్రధానంగా ఎముకలు, దంతాలు వంటి అవశేషాలపై ఆధారపడేవారు. కానీ ఈ ఆవిష్కరణ వల్ల మనుషులు వాడి పడేసిన చిన్న వస్తువులు కూడా విలువైన జీవ సంబంధ సమాచారాన్ని అందించగలవని స్పష్టమైంది. ఒక చిన్న పదార్థం కూడా ఒక వ్యక్తి జీవితానికి సంబంధించిన విలువైన ఆధారంగా ఎలా మారిందో ఈ పరిశోధన చూపించింది.
చిన్న ముక్క.. వేల ఏళ్ల చరిత్ర
5,700 ఏళ్ల క్రితం ఒక మహిళ నమిలి వదిలేసిన చిన్న బిర్చ్ పిచ్ ముక్క ఇంతకాలం భూమిలో ఉండిపోయింది . కానీ దాని లోపల ఆమె జీవితం గురించి ఎన్నో వివరాలు ఉన్నాయి . ఎముకలు, దంతాలు మాత్రమే కాదు.. మనుషులు వదిలేసినా చిన్న చిన్న వస్తువులు కూడా గతాన్ని అర్థం చేసుకునే ‘టైమ్ క్యాప్సూల్స్’ కావచ్చని డెన్మార్క్ ఆవిష్కరణ నిరూపించింది. ఇది పురావస్తు శాస్త్రంలో కొత్త పరిశోధనా అవకాశాలకు తలుపులు తెరిచింది.
