అప్రమత్తతే ప్రాణరక్షణ
ఆపద సమయంలో భయం కాదు.. ప్రశాంతత, సమయస్ఫూర్తి, సరైన చర్యలే ప్రాణాలను కాపాడగలవు.
ఒకప్పుడు భూకంపాలు అరుదుగా సంభవించేవి. కానీ ఇటీవల ప్రపంచంలోని అనేక ప్రాంతాల్లో తరచుగా భూమి కంపిస్తున్న ఘటనలు నమోదవుతున్నాయి. దీనితో ప్రజల్లో ఆందోళన పెరుగుతోంది. భూకంపం ఎప్పుడు, ఎక్కడ సంభవిస్తుందో శాస్త్రవేత్తలు కూడా కచ్చితంగా చెప్పలేని పరిస్థితి ఉంది. అందుకే భయపడటం కంటే అప్రమత్తంగా ఉండటం ఎంతో ముఖ్యం అని విపత్తు నిర్వహణ నిపుణులు సూచిస్తున్నారు.
భూకంపం సంభవించిన సమయంలో భయంతో పరుగులు తీయడం కంటే “డ్రాప్–కవర్–హోల్డ్” విధానాన్ని పాటించాలి. వెంటనే కిందకు వంగి, బలమైన టేబుల్ లేదా మంచం కింద ఆశ్రయం తీసుకుని తల, మెడను చేతులతో కప్పుకోవాలి. కిటికీలు, అద్దాలు, అల్మారాలు, ఫ్యాన్లు వంటి పడిపోయే వస్తువులకు దూరంగా ఉండాలి. బహుళ అంతస్తుల భవనాల్లో ఉన్నవారు ఎట్టి పరిస్థితుల్లోనూ లిఫ్ట్ను ఉపయోగించకుండా మెట్ల ద్వారానే బయటకు రావాలి.
ఆరుబయట ఉన్నవారు భవనాలు, చెట్లు, విద్యుత్ స్తంభాలు, హోర్డింగులకు దూరంగా ఖాళీ ప్రదేశంలో నిలవాలి. వాహనంలో ప్రయాణిస్తున్నవారు రోడ్డు పక్కన సురక్షితంగా వాహనాన్ని ఆపి, వంతెనలు లేదా ఫ్లైఓవర్ల కింద నిలపకుండా ప్రకంపనలు పూర్తిగా ఆగే వరకు వాహనంలోనే ఉండాలి.
భూకంపం అనంతరం గ్యాస్ లీకేజీ, విద్యుత్ ప్రమాదాలపై అప్రమత్తంగా ఉండాలి. అవసరమైతే మెయిన్ స్విచ్ను ఆఫ్ చేయాలి. సోషల్ మీడియాలో వచ్చే పుకార్లను నమ్మకుండా అధికారిక సమాచారం మాత్రమే విశ్వసించాలి. వృద్ధులు, పిల్లలు, దివ్యాంగులకు ముందుగా సహాయం అందించడం ప్రతి ఒక్కరి బాధ్యత.
