ప్రస్తుత కాలంలో చాలామంది డబ్బు సంపాదించడం, ఆస్తులు కూడబెట్టడం, పిల్లల భవిష్యత్తు కోసం ప్రణాళికలు వేయడంతోనే ఎక్కువ సమయం గడుపుతున్నారు. ఇవన్నీ అవసరమే కానీ వాటన్నింటికంటే విలువైన సంపద మరొకటి వుంది . అదే ఆరోగ్యవంతమైన శరీరం. ఎంత ధనం ఉన్నా, స్వయంగా లేచి నడవలేని పరిస్థితి వస్తే ఆ సంపద ఆనందాన్ని ఇవ్వలేకపోతుంది.
వృద్ధాప్యంలో నిజమైన సంతోషం బ్యాంకు బ్యాలెన్స్లో కాదు, ఇతరుల సహాయం లేకుండా తన పనులు తాను చేసుకోగలిగే సామర్థ్యంలో ఉంటుంది. మంచం నుంచి లేచి నడవడం, బాత్రూమ్కు వెళ్లడం, ఒక గ్లాసు నీళ్లు తీసుకుని తాగడం వంటి సాధారణ పనులే అప్పటికి గొప్ప వరాలుగా అనిపిస్తాయి. అందుకే ఆరోగ్యాన్ని నిర్లక్ష్యం చేయకుండా ఇప్పటి నుంచే జాగ్రత్తలు తీసుకోవడం అవసరం.
రోజూ కనీసం అరగంట నడక, తేలికపాటి వ్యాయామం, యోగా, సమతుల్యమైన ఆహారం, తగినంత నిద్ర వంటి అలవాట్లు శరీరాన్ని దృఢంగా ఉంచుతాయి. మానసిక ప్రశాంతత కూడా ఆరోగ్యానికి ఎంతో అవసరం. అధిక ఒత్తిడి, ఆందోళన, కోపం వంటి భావోద్వేగాలు శారీరక ఆరోగ్యంపైనా ప్రభావం చూపుతాయి. అందుకే ధ్యానం, పుస్తక పఠనం, కుటుంబంతో సమయం గడపడం వంటి అలవాట్లు కూడా జీవిత నాణ్యతను పెంచుతాయి.
పిల్లలు తల్లిదండ్రులను ప్రేమిస్తారు. కానీ వారికి కూడా వారి కుటుంబం, ఉద్యోగం, బాధ్యతలు ఉంటాయి. అందువల్ల వృద్ధాప్యంలో పూర్తిగా ఇతరులపై ఆధారపడకుండా ఉండాలంటే ఆరోగ్యమే నిజమైన భరోసా. చివరికి మనిషి జీవితంలో అత్యంత విలువైన ఆస్తి ఇల్లు, భూమి, డబ్బు కాదు.. చివరి వరకు స్వయంగా నిలబడి, నడవగలిగే ఆరోగ్యవంతమైన శరీరమే.
