యువత తీరు.. దారి తప్పితే ముప్పు
వారి కలలను మత్తు, అతి వేగం మింగేస్తున్నాయి
- ఇటీవల విజయవాడలో ఇద్దరు యువకులు మత్తు పదార్ధాలు సేవించి ఆ మత్తు లో రెండు కార్లతో ఢీ కొని హడావుడి చేశారు.
- విజయవాడలో కొందరు యువత తరచూ అర్ధరాత్రి వేళల్లో రయ్ రయ్ మంటూ బైక్ లతో గందరగోళం సృష్టిస్తున్నారు. సమాజంలో జీవించేటప్పుడు భయం బాధ్యత ఉండాలి. కానీ కొందరు యువత ఈ విషయాలను విస్మరించి ప్రవర్తిస్తున్నారు.
దేశం అభివృద్ధికి యువశక్తి అవసరం.. జెన్ జి ఆలోచనలు, కృషి, ప్రతిభే దేశ భవిత కు పునాది. ప్రస్తుతం కొంతమంది యువకులు అమూల్యమైన జీవితాన్ని మత్తు పదార్థాలు, నిర్లక్ష్యపు బైక్ రేసులు, ఆవేశపూరిత ప్రవర్తనలతో ఇబ్బంది కర పరిస్థితి లు ఎదురవుతున్నాయి. జీవితంలో ఉన్న విస్తృత అవకాశాలను వదిలిపెట్టి క్షణిక ఆనందాల కోసం పరుగులు తీస్తున్నారు.
ఒకప్పుడు యువత చదువు, ఉద్యోగం, క్రీడలు, సామాజిక సేవల ద్వారా గుర్తింపు పొందాలని కలలు కనేవారు. ఇప్పుడు కొందరిలో మాత్రం సోషల్ మీడియాలో పేరు రావడం, స్నేహితుల ముందు గొప్పగా కనిపించడానికి ప్రమాదకరమైన మార్గాల వైపు వెళుతున్నారు. రోడ్డుపై వేగంగా బైక్ నడపడం, వీలింగ్లు చేయడం, మత్తు పదార్థాలు తీసుకోవడం కొందరికి ఫ్యాషన్గా మారిపోయింది. కానీ ఆ ఫ్యాషన్ వెనుక దాగి ఉన్న ప్రమాదాలను గుర్తించలేకపోతున్నారు.
గంజాయి, ఇతర మత్తు పదార్థాల వినియోగం యువతలో పెరుగుతున్న ఒక తీవ్రమైన సామాజిక సమస్యగా మారుతోంది. సరదాగా ఒకసారి ప్రయత్నిద్దాం అనే ఆలోచనతో మొదలైన అలవాటు, కొద్ది రోజుల్లోనే వ్యసనంగా మారుతోంది. మొదట్లో అది ఆనందంగా అనిపించినా, తరువాత చదువుపై ఆసక్తి తగ్గడం , ఆరోగ్య సమస్యలు రావడం, కుటుంబ సభ్యులతో విభేదాలు పెరగడం వంటి పరిణామాలు ఎదురవుతున్నాయి. చివరకువై యువతతో అతని కుటుంబం మొత్తం మానసికంగా, ఆర్థికంగా ఇబ్బందులు పడే పరిస్థితి ఏర్పడుతోంది.
మరోవైపు రాత్రి వేళల్లో జరుగుతున్న బైక్ రేసులు కొత్త ప్రమాదాలకు కారణమవుతున్నాయి. వేగమే విజయం అనుకునే కొందరు యువకులు ట్రాఫిక్ నిబంధనలను పూర్తిగా విస్మరిస్తున్నారు. రోడ్లపై విన్యాసాలు చేస్తూ తమ ప్రాణాలను ప్రమాదంలోకి నెట్టడమే కాకుండా అమాయకుల ప్రాణాలకు కూడా ముప్పు తెస్తున్నారు. ఒక క్షణం నిర్లక్ష్యం జీవితాంతం బాధగా మిగిలిపోవచ్చనే విషయాన్ని వారు విస్మరిస్తున్నారు.
ఈ పరిస్థితులకు కారణాలు అనేకం. తల్లిదండ్రుల పర్యవేక్షణ తగ్గిపోవడం, పిల్లలతో సమయం గడపకపోవడం, చెడు స్నేహాలు, సోషల్ మీడియా ప్రభావం, సులభంగా డబ్బు అందుబాటులో ఉండటం వంటి అంశాలు యువతను తప్పుదోవ పట్టిస్తున్నాయి. పిల్లల అవసరాలు తీర్చడం మాత్రమే కాదు, వారి భావోద్వేగాలను అర్థం చేసుకోవడం, సరైన మార్గనిర్దేశం చేయడం కూడా తల్లిదండ్రుల బాధ్యత.
మీ చేతిలోనే మీ భవిష్యత్తు
- శక్తిని గుర్తించండి: మీ శక్తిని బైక్ రేస్లకు కాకుండా చదువుకు, కొత్త స్కిల్స్కు వాడండి.
- క్షణికావేశం వద్దు: గొడవపడే ముందు ఇంట్లో ఎదురుచూసే అమ్మా, నాన్న శ్రమ గుర్తుకు తెచ్చుకోండి.
- మిత్రుడు ఎవరో తెలుసుకోండి: మత్తు అలవాటు చేసేవాడు మిత్రుడు కాదు. పైకి లాగేవాడే నిజమైన స్నేహితుడు.
- క్రమశిక్షణే స్వేచ్ఛ: అర్ధరాత్రి తిరగడం స్వేచ్ఛ కాదు, నిర్లక్ష్యం.
అయితే పరిస్థితి పూర్తిగా చేజారిపోలేదు. యువత తమలోని శక్తిని గుర్తించి సానుకూల దిశగా మళ్లిస్తే అద్భుతాలు సృష్టించగలరు. కొత్త నైపుణ్యాలు నేర్చుకోవడం, క్రీడల్లో రాణించడం, ఉపాధి అవకాశాల కోసం కృషి చేయడం, సమాజానికి ఉపయోగపడే పనుల్లో పాల్గొనడం ద్వారా తమ జీవితాలను ఉన్నత స్థాయికి తీసుకెళ్లవచ్చు. నిజమైన విజయం వేగంలో కాదు, లక్ష్యాన్ని చేరుకునే క్రమశిక్షణలో ఉంటుందని గుర్తించాలి. పోలీసులు కూడా యువత మత్తు పదార్ధాలు తీసుకుంటే కలిగే నష్టాల అవగాహన ర్యాలీలు చేస్తున్నారు .
యువత దేశానికి వెన్నెముక మాత్రమే కాదు, దేశ భవిష్యత్తును మలిచే శక్తి. ఆ శక్తి మత్తులో కరిగిపోతే కుటుంబాలు నష్టపోతాయి, సమాజం బలహీనపడుతుంది, దేశం వెనుకబడుతుంది. అందుకే యువత ప్రతి అడుగు ఆలోచించి వేయాలి. నేటి నిర్ణయాలే రేపటి జీవితాన్ని నిర్ణయిస్తాయి. కలలను నెరవేర్చే దారిని ఎంచుకోవాలి గానీ, కలలను కాల్చేసే మత్తు మరియు నిర్లక్ష్యపు మార్గాలను కాదు. యువత మారితేనే దేశం మరింత బలంగా ముందుకు సాగుతుంది.
గుర్తుంచుకోండి, మీరు దేశానికి వెన్నెముక. మత్తులో, రేసుల్లో జీవితాన్ని తాకట్టు పెట్టకండి. రేపటి చరిత్రను మీరే రాసుకోండి
