రాళ్లలో దాగిన పురాణ గాథ
చిన్నప్పుడు గోళీలు ఆడిన రోజులు గుర్తున్నాయా? నేలపై చిన్న వృత్తం గీసుకుని, గురి చూసి గోళీ కొట్టడం.. గెలిచినా, ఓడినా ఆ చిన్న గోళీలే ప్రపంచంలో అత్యంత విలువైనవిగా అనిపించేవి. అయితే, ఒకరోజు ఎవరో మీతో ‘ఈ భారీ గుండ్రటి రాళ్లు ఒకప్పుడు గోళీలే.. కానీ అవి మనవి కాదు, మహాభారతంలోని భీముడివి’ అని అంటే మీకెలా అనిపిస్తుంది.
ఇదేదో కట్టుకథ అనుకుంటారు . కానీ దీన్ని పూర్తిగా కొట్టిపారేయలేం కూడా.
భీముడు – బలానికి ప్రతీక
మహాభారతంలో భీముడు అపారమైన బలానికి ప్రతీక. పర్వతాలను కదిలించగలిగి, రాక్షసులను సంహరించిన మహావీరుడిగా వర్ణిస్తారు. ఆ బలం శారీరక శక్తి మాత్రమే కాదు.. ప్రకృతి అపార శక్తికి ప్రతీక కూడా. అందుకే భూమిపై చెల్లాచెదురుగా కనిపించే భారీ గుండ్రటి రాళ్లను చూసిన ప్రజలు, వాటిని భీముడితో పోలుస్తారు . ఇది చారిత్రక సత్యాన్ని నిరూపించే ప్రయత్నం కాదు.. ప్రకృతి వైభవాన్ని అర్థం చేసుకోవడానికి మనిషి ఊహాశక్తి నిర్మించుకున్న ఒక అందమైన కథ.
శాస్త్రం చెప్పేది.. జానపదం చెప్పేది
భూగర్భ శాస్త్రం ప్రకారం ఈ రాళ్లు లక్షలాది సంవత్సరాల పాటు జరిగిన భౌగోళిక మార్పులు, ఒత్తిడి, వాతావరణ ప్రభావాల వల్ల ఏర్పడ్డాయి. కానీ జానపద విశ్వాసం వేరే కథ చెబుతుంది. ‘ఇవి భీముడు ఆడిన గోళీలు కావచ్చు..’
‘ఆయన ఇక్కడే ఆడుకుని వదిలి వెళ్లి ఉండవచ్చు..’ అని తరతరాలుగా ప్రజలు చెప్పుకుంటూ వచ్చారు. ఇది శాస్త్రీయ వాదన కాదు.. ప్రకృతిని పురాణంతో ముడిపెట్టిన సాంస్కృతిక ఊహ.
కథలతో పవిత్రమైన భూమి
భారతీయ ఇతిహాసాలు పుస్తకాలకే పరిమితం కావు. అవి కథల రూపంలో ఒక తరం నుంచి మరో తరానికి ప్రయాణిస్తాయి. ఆ కథలతోనే ప్రాంతాలు పవిత్ర స్థలాలుగా మారుతాయి. అలా ఒక విచిత్రమైన రాయి కనిపిస్తే దానికి ఒక కథ పుడుతుంది. అసాధారణమైన భూభాగానికి ఒక పురాణం జత అవుతుంది. క్రమంగా ఆ రాళ్లు కేవలం రాళ్లు కాకుండా, భీముడి గోళీలుగా ప్రజల ఊహల్లో శాశ్వత స్థానం సంపాదించుకుంటాయి.
మనిషి ఊహకు నిదర్శనం
ఈ కథ భీముడి గురించి మాత్రమే కాదు. ప్రకృతి రహస్యాలను అర్థం చేసుకోవాలనే మనిషి సహజ స్వభావం గురించి కూడా చెబుతుంది. సమాధానం లేని ప్రశ్నలకు కథల రూపంలో అర్థాన్ని వెతకడం మానవ సంస్కృతిలో భాగం.
అలా నిశ్శబ్దమైన రాళ్లు జ్ఞాపకాలుగా మారతాయి. భౌతిక వస్తువులు సంస్కృతికి ప్రతీకలవుతాయి.
నిజం ఏదైనా.. విలువ మాత్రం అమూల్యం
ఈ రాళ్లు నిజంగానే భీముడి గోళీలా? అనే ప్రశ్నకు చారిత్రక ఆధారాలు లేకపోవచ్చు. కానీ వాటి అసలు విలువ అక్కడ కాదు. తరతరాలుగా స్థానిక ప్రజలు ఈ కథలను చెప్పుకుంటూ వచ్చారు. ఆ కథల ద్వారా సాధారణ రాళ్లను సజీవ సాంస్కృతిక వారసత్వంగా మార్చారు. ఈ రాళ్లు మనకు ఒక సందేశాన్ని ఇస్తాయి. ప్రకృతి అద్భుతాలను కేవలం శాస్త్రంతోనే కాదు, కథలతో, విశ్వాసాలతో, ఊహాశక్తితో కూడా చూడవచ్చని గుర్తు చేస్తాయి. చరిత్రకు, పురాణానికి మధ్య ఉన్న ఆ అద్భుతమైన సరిహద్దును ఇవి నేటికీ సజీవంగా ఉంచుతున్నాయి.
